من طرف قالولى بيع وانت الكسبان
قلت اعمل ايه وقعدت حيران
اسمع كلامهم وابيع وانا سكران
ولا افكر وادور واشوف هيدونى ايه وانا غلبان
فكرت ودورت ولقيت بلاوى واطران
هيبيعونى نصيبى فى بلدى وفى الاطيان
وبعدين اهاجر وادور على مكان تانى زى الديدان
واعيش غريب طول عمرى وغلبان
فقلت لأ انا مش هبيع
ابيع ماضيا وابيع حياتى
ولا ابيع واعلن وفاتى
ولا ابيع وتزيد اهاتى
فقلت لأه مش هبيع وحقى فيكى مش هيضيع
قلت هفضل حاضن ترابك حتى لو كتر الدبيح
وزادت الضغوط عليا وعلى كل اللى حواليا
وعذبونى وضربونى ولموا الناس عليا
وقالوا عليا خاين وانى مش عايز مصلحتك
وانى عميل لاسرائيل وانى بعتك
وانى حاقد ع الاغنيا اللى فارقوا حضنك
بالقروض اللى واخدينها من دمك
وانى عايز الفقر سمة نتوصف بيها فى ساحتك
وانى قاتل امل الشباب الى عطلان
وانى اللى قافل على الرزق كل البيبان
وانى زودت نسل العيال
وانى خربت البلد وخليت الواطى عالى
قلتلهم ده انا غلبان
وان همى اعيش واموت فى بلدى
وانى اربى العيال
وانى لما لقيت الخلق مش فاهمة قلت لازم يعرفوا ليه البيع
انا مش حرامى ولا بتاجر فى نفوس البشر
ولا انا همى انى اشق الحجر
ولا همى انى اخلى الناس مش غجر
وان كل واحد يقول انا هشترى ومش هبيع
عشان كده وقفت فى نص المحكمة
قدامى قاضى وناس كتيرة مبلمة
مش فاهمة يعنى ايه هنبيع
وتقولى بيع يااهبل ده رزق من السما
دى الفرصة بتيجى مرة واحدة فى الازمنة
ويقولولى يامجنون ياشرذمة
يعنى تقول للنعمة كخ يامجرمة
خليك كده فى ا لفقر عايش
خليك كده للرزق حايش
خليك كده ياحمار ياسارح
فصرخت بأعلى صوت ليا وقلت لكل اللى حواليا
ياناس هتبيعوا ايه وتبيعوا ليه
وازاى تبيعوا وانتوا متباعين اساسا
ازاى تبيعوا وكل شبر فى ارضكم مش من حقكم
هتبيعوا ايه ياهبل ده من جهلكم
ما احنا خلاص اتبعنا
وكلامنا كله مالوش معنى
ولا اى حد فى البلد هيسمعنا
احنا خلاص جيل وانقرض
احنا مبقاش لينا اى منقلب
احنا اترمينا فى ترعة متركمة
فيها الزبالة من سنين متجمعة
اترموا فيها ما انتوا الامعة
وصوتى اتنبح من الصريخ
لكنه كان اوطى من الريح
وعدى صوتى وكل اللى عمله انه ساب فى زورى دبيح
والبيعة خلصت واتفضت
لكنى لسة واقف لوحدى وبقول مش هبيع
انا مش هبيع
