من طرف حبة صبر شوية ياعم
اهدى بقى واصبر واتلم
وارمى الزعل والنكد والهم
بكره الفرحة باذنه تعم
ايه يعنى منتش لاقى شغل
ايه يعنى مصيرك تم
ايه يعنى متجوزتش
ايه يعنى مليان هم
عندك واسطة يبقى تروق
لاتشيل هم المونى والشغل
ولا تشيل هم ايجار الشهر
بكره تلاقى احسن شغل
واحلى مرتب ما انت الكل فى الكل
لاتقولى كفاءة ولا جودة
الواسطة هى اللى بتودى
فى اعلى المناصب والمقامات
وكمان مرتبك اعلى المرتبات
هاتلك واسطة بالمليارات
مياخدش مصرى ياخد دولارات
وكلها يوم مش سنوات
تستلم الشغل من غير لا خد ولا هات
ولا يوم عدا ولا شهر فات
ولا رشوة لموظف عادى
عشان تخلص الاستمارات
انت ياعم اخدت نصيبك
ولقيت واسطة هايلة فى جيبك
الدور والباقى ع التانيين
اللى ع القهاوى مترصصين
لامعاهم فلوس ولا واسطة
ولاحتى ورقة بقرشين
خليهم كده مخللين
امشى انا بقى اروح الحق واسطة
اصل اليومين دول بقوا غاليين
