من طرف منرضاش نكون رخاص
منرضاش نموت بالرصاص
منرضاش نكون مستسلمين
للغلا ولظلم الناس
منرضاش تكون اللحمة اغلى
من اللولى والالماس
منرضاش المية تبقى مليانة
بنزين ورصاص
منرضاش يبقى رغيف العيش
مليان كبريت ونحاس
منرضاش تكون الروح
منزوعة الاحساس
منرضاش يكون الثمن
هجر الشباب للكاس
كاس الوطن يابشر
بقى هو ارخص كاس
بقى الفقير ملهوش فى الدنيا اى اساس
واللى معاه الفلوس يشترى الذمم والانفاس
بقى الفقير مننا حياته عار ع الوطن
بقت التجارة الرابحة تجارة الضمير والذمم
بقت الحياة فى الشقق حلم عالى قوى
وحلمنا الواقعى هو رصيف نمرة كام
ناس يرموا الفلوس ع الرقص والخلاعة
ومش حاسين قد ايه هى المجاعة
وعلى رأى مطرب الجماعة
ياناس ياللى فوق ما تبصوا ع اللى تحت
ولا النظر معدوم ولا انتوا اللى متعرفوش تحت
تحت دول هما السلالم اللى انتوا وصلتوا بيهم
تحت دول هما الغلابة اللى انتوا طلعتوا عليهم
تحت دول هما اللى الوطن قايم على ايديهم
تحت دول سًفوا التراب ويا الضباب فى رئتيهم
تحت دول اللى الزمن معداش عليهم
تحت دول جوه الكهوف والعشش مبانيهم
تحت دول عملتوا ايه عشان ترضوهم
امتى اخر مرة روحتوا زورتوهم
امتى اخر مرة بصيتوا عليهم
امتى اخر مرة دققتوا فى عنيهم
هتشوفوا الذل والكرامة سواء
هتشوفوا الطيبة والقسوة
هتشوفوا الراحة والعناء
هتشوفوا الصبر والابتلاء
هتشوفوا الحب والجفاء
هتشوفوا القهر والكبرياء
هتشوفوا الغفلة والدعاء
لا عمرهم قالوا اشمعنى احنا كده
لا عمرهم قالوا ياحكومة بصيلنا
ياحكومة ده احنا بشر
اساس ومركز للوطن
ياحكومة احنا ناسك
لو يوم هتدوسينا
هنعمل ايه فى غيابك
ما انتى شايفة الاكابر عاملين معانا ايه
بيعتبرونا سلالة مزابل التاريخ
ويوصوكى ياحكومة لا تغًلى البطيخ
والسمنة والسكر والملح والزرنيخ
لجل احنا نتعلم احنا منسواش حاجة
نموت عشان لقمة ونموت على الحاجة
ولا يوم هتعملولنا فيه اى حاجة
عشان كده هنقول ونقول
منرضاش نكون ولا حاجة
لكن ولا واحد سمع من كلامى اى حاجة
