من طرف إزيكم يا شباشيب و يا بنانيت ؟
ليكو وحشة و الله من أيام رمضان و العيد
إموهم ..
مين فينا مالوش ذكريات مطبخية ! _ و خصوصا البنانيت _
ذكريات مع حرق حلة الرز
و قلى السمك من غير دقيق
و هلم جرا _ لغة عربية فصيحة فصيحة يعنى _
لذلك قرر المجمع المطبخى الدولى بمنتدى مش فاكر توثيق فضايحنا المطبخية فى أوراق رسمية
و على كل عضو و عضوة _ و خصوصا عضوة دى _ إنه ييجى يدلى بشهادته أما المجمع
و يقدم لينا دليل إدانته فى فشله الذريع فى شغل المطبخ
يعنى أنا مثلا عرفت من واحد إنه كان داخل المطبخ يتفلحص و قال لما أجرب أعمل رز
المهم سأل و بحث و دور و إتصل بإسأل إستشير لحد ما عرف السر الخطير _ طريقة عمل الرز _
و بدأ صاحبنا فى تنفيذ العملية الجهنمية المهلبية _ طريقة عمل الرز برضه _
جهز كل حاجة و تمام التمام و الرز بقى فى الحلة و كل حاجة سنجاموز
و كان فى باله دايما العبارة الخالدة اللى قالتها أمهاتنا العظام _ أعظم عظمات الستات _
خد بالك من مية الرز و إوعى الرز يحتاج مية
و كان بالفعل ..
صاحبنا فضل مركز مع الرز و كل ما المية تخلص يحط كوباية مية تانى
كل ما المية تخلص يحط كوباية مية تانى
لحد ما فى مرة بيحط كوباية المية لقى الرز مش بيشرب المية
الرز وصل لمرحلة التشبع _ الكيميائية _
و بقى الرز فى النص التحتانى من الحلة و المية فى النص الفوقانى
صاحبنا ييأس ؟؟
يسيب حلة الرز ؟
لا يونكن أبدا ..
راح لابس الشورت التيفال بتاعه و نازل فى الحلة يطلع الرز بالمعلقة
أن أن آاااااااااااااااان .. تششششششش
الرز طلع كله فى المعلقة عبارة عن كتلة واحدة كأنه صينية كيك
و من ساعتها و صاحبنا إقتنع بالنظرية العلمية التجارية الهندسية ..
إن أفضل وجبة و إنت عايش لوحدك هى علبة تونة مع جبنة رومى و 1/8 زتون كالاتاتا
و إنتوا بقى مغامراتكم المطبخية إيه ؟
it's your turn
منقول من احمد
