من طرف 
هتصدقي لو قلت لِك
كان نفسي اريَّح راسي فوق صدرك
واعيط واترمي فْ حضنك وانـام؟!
فعلاً غبي
وانا مش هاقول لك ليه غبي
أصل انتِ عارفة
ان اللي شافك بسمة في الليل الكئيب
لازم يكون إنسان غبي
وان اللي يشطب أي حلم
عشان يكون في عيونك انتِ المركبة
إنسان غبي
علشان بحبك زي عيل في ابتدائي
وأي نظرة من عيونك تقتله
فيقول في أشعار الصبايا
والعيون المليانين طيبة وشجن
ويقوم يقول لك وببساطة
ممكن اتكلم معاكِ
لو سمحتِ
ممكن افرد غربتي
قدام عيونك واتسجن
بس انتِ فكرتِ اللي قال الكلمتين
إنسان ضعيف
وماتعرفيش إن الضعيف
هو اللي كسَّر ألف سد عشان يقول الكلمتين
...
البحر زي ما كان زمان
رافض يلم الموج ويسمع غنوتي
يا بحر ليه موجك عنيد
الحزن عمره ما كان كئيب
الحزن موجة عايزَة توصل للشطوط
فماتسجنوش
ولو اني برضه باعشقك
علشان ماشفتش موجة بتبص لورا
لكني ليّ عتاب بسيط
بيقولوا إن البحر مليان بالهموم
ويحب يسمع أي شكوى
حتى لو كات من غريب
مع إني مش شايفك كده
أنا حاسس ان الموج غضب
وان انت كاره أي إحساس بالغضب
علشان كده بتحب ترمي الموج بعيد
وعشان كده أنا لما جيت أشكي الهموم
فكرْتِني موجة
ورحت عملت سد
أتاريك مابتكلمش حد
