سياسى اجتماعى منوع


    ميك أب سواريه بألوان جريئة

    شاطر
    avatar
    سندريلا
    مشرف
    مشرف

    عدد الرسائل : 681
    تاريخ التسجيل : 22/10/2008

    ميك أب سواريه بألوان جريئة

    مُساهمة من طرف سندريلا في الخميس أبريل 08, 2010 12:02 pm

    ترطيب البشرة
    أول حاجة هنعملها قبل ما نبدأ الميك أب إننا ننظف البشرة كويس ولو "البشرة جافة" لازم نحط كريم ترطيب، ونسيب البشرة شوية علشان تمتص الكريم.

    توزيع كريم الأساس
    تاني خطوة هنعملها إننا نوزّع كريم الأساس، وطبعاً لازم يتوزّع كويس جداً على البشرة، وأحسن حاجة علشان توزيع كريم الأساس يكون سهل إننا نوزعه بالفرشة، وناخد بالنا وإحنا بنوزع كريم الأساس إننا ما نضغطش على البشرة جامد؛ لأن ده ممكن يخلي كريم الأساس يشقق.

    وأهم حاجة إننا نختار ماركة كويسة ومضمونة من كريم الأساس علشان يبان طبيعي من غير ما يضر لنا بشرتنا، وكمان يثبت معانا لفترة طويلة.

    منطقة تحت العيون.. وتوزيع البودرة السايبة
    بعد ما وزعنا كريم الأساس على الوش كله بنيجي لمنطقة تحت العيون، وهنبدأ نحط عليها خليط من كريم الأساس، بس يكون بدرجة فاتحة شوية على بيج مع مصحح العيوب؛ وده علشان نداري الهالات السوداء وبنوزعه بطريقة التربيت أو "الطبطبة"، وبعد كده بنيجي لمرحلة اللوس باودر "البودرة السايبة" ودي مهمة جداً لتثبيت الميك أب.

    وهنختار درجة فاتحة من البودرة السايبة تكون على مصفرة شوية لمنطقة تحت العيون.. أما بالنسبة للوش كله فإحنا هنستخدم لون طبيعي يكاد يكون شفاف ومن غير أي لمعة "مط" علشان مظهرنا يكون طبيعي وهادي وجذاب في نفس الوقت.

    وفيه حاجة مهمة أوي أحب أقولها لكل البنات، وهي إنهم لازم يختاروا الدرجة المناسبة من كريم الأساس والبودرة، ويبعدوا عن الدرجات الفاتحة أوي حتى لو كانت بشرتهم فاتحة؛ لأن ده هيكون ضدهم ومش هيديهم الشكل الجذاب اللي هما عايزينه في النهاية.

    كمان عايزة أنبههم لغلطة كبيرة بيقعوا فيها، وهي كثرة وضعهم لإيديهم على بشرتهم؛ لأن ده ممكن يعمل بقع ويصيب البشرة ببكتيريا، ولازم دايماً يكون معاهم الإسفنجة الخاصة بتاعتهم والبدارة علشان يقدروا يجففوا بها العرق ويظبطوا الميك أب في المنطقة اللي بتتعرّض للدهون، وهي منطقة الجبهة والأنف وكمان منطقة تحت الذقن.
    الرسمة الديجراديه للعيون الواسعة
    ودلوقتى هنبدأ في رسم العيون، لكن زي ما قولنا قبل كده إننا بنسيب اللوس باودر "البودرة السايبة" تحت العين علشان نحافظ على المنطقة دي من الآي شادو أو الكحل اللي ممكن يسيح عليها وإحنا بنرسم العين..

    ودلوقتي يلّا نشوف خطوات رسم العيون بالطريقة الديجراديه "المزج التدريجي للألوان"، والطريقة دي نقدر نعملها لما تكون مساحة العين عندنا واسعة وكبيرة:

    1- أول خطوة هنعملها هي إننا نرسم الحواجب، وهنستخدم شادو مضغوط علشان نملى به الفراغات الموجودة في الحواجب وبنختار اللون البني الغامق.. وطبعاً مش بنستخدم اللون الأسود لأنه هيدينا شكل مش طبيعي.

    2- بعد ما خلصنا رسم الحواجب هنيجي للخطوة التانية، وهي رسم العين بالآي شادو "ظل الجفون"، وهنبدأ في توزيع اللون الأساسي بتاعنا على الجفن المتحرك وطبعاً لازم نستخدم الفرشاة الخاصة بتوزيع الآي شادو في المنطقة دي.

    3- بعد كده هنستخدم فرشة رفيعة أوي علشان نقدر نحدد بها المنطقة اللي فوق جذور الرموش بالظبط، وبنسحب من نصف الجفن لغاية بره باللون الأسود.

    4- وبنجيب لون أخضر غامق وبنسيّحه على المنطقة اللي فوق الرموش.

    5- وعلشان الموديل اللي معانا عينيها واسعة فإحنا عندنا جرأة إننا نستخدم معاها اللون الأسود، أما البنات اللي عينيهم ضيقة فبننصحهم بالابتعاد عن اللون الأسود، وممكن إنهم يستخدموا ألوان زي التركواز أو الرمادي أو الأخضر بدرجاته.

    6- بعد كده هنبدأ نسيح الأسود اللي في آخر العين ودي طريقة حلوة أوي وبتناسب أكتر البنات اللي عينيهم لونها بني أو عسلي.

    7- وبنمزج الأسود مع لون ذهبي مصدف بأخضر في أصفر عند الزاوية الخارجية للعين، وطبعاً المزج ده بيخلي الميك أب شكله حلو، بس يا ريت إننا ما نكترش علشان شكلنا يبقى بسيط.

    8- وعلشان إحنا بنعمل ميك أب سواريه فهنستخدم اللون الذهبي تحت الحواجب؛ لأنه بيدي إضاءة حلوة أوي.



    تركيب الرموش
    دلوقتي هنيجي لخطوة تركيب الرموش، وإحنا زي ما هنشوف في الفيديو بنستخدم الرموش المنفصلة واسمها "رموش بالواحدة" (موجودة في كل الصيدايات الكبيرة اللي بتبيع مستحضرات التجميل) وهنبدأ في تثبيتها بالملقاط على الزاوية الخارجية للعين، بس مش على العين كلها؛ لأن الموديل اللي معانا رموشها حلوة، لكن المنطقة الخارجية بس عندها هي اللي خفيفة شوية.

    وبعد كده هنبدأ نحدد العين من تحت بقلم كحل لونه كحلي وده هيبقى حلو أوي مع ألوان الآي شادو اللي إحنا عملناها.. وأحسن طريقة نحط بيها الكحل هي إننا نشد العين لتحت شوية، ونبدأ نرسم علشان ما نجرحش العين.

    ودلوقتي هنحط الماسكرا، وبكده نكون خلصنا رسم العين، وبنبدأ نشيل اللوس باودر "البودرة السايبة" اللي كنا حطينها تحت العين بالفرشة علشان تشيل كل الزيادات اللي تحت العين.

    أحمر الخدود
    ودلوقتي جينا لمرحلة البلاشر أو "أحمر الخدود"، وهنختار لون هادي؛ لأننا استخدمنا ألوان كتيرة في رسمة العين، وطبعاً شكل الوش هو اللي هيحدد لنا الطريقة اللي هنوزع بها أحمر الخدود.
    وممكن إننا نستخدم لووس باودر "بودرة سايبة" لامعة على الخدود علشان تدينا شكل سواريه أكتر للميك أب.

    إصلاح عيوب الشفايف
    بالنسبة لرسمة الشفايف فعلشان الموديل اللي معانا شفايفها اللي فوق أعرض شوية من اللي تحت؛ فإحنا هنراعي إننا نكبر الشفايف اللي تحت بقلم التحديد زي ما هنشوف في الفيديو، وبعد كده نحط الروج وملمع الشفاه.

    وفي النهاية عايزة أقول لكل البنات إننا قبل ما نبدأ نحط أي ميك أب لازم نكون مجهزين البشرة، وده بإننا نعمل لها تنظيف كويس جداً، وبعدين نحط لها كريم مرطب، بس لازم نراعي إن الكريم ده يكون مش دهني أوي بحيث يكون سريع الامتصاص للبشرة.

    وبالنسبة للشفايف فإحنا لازم كل يوم بالليل نغذيها بخليط من زيت اللوز مع الجليسرين أو نستخدم زبدة كاكاو.


    _________________

      الوقت/التاريخ الآن هو الإثنين ديسمبر 17, 2018 6:39 am